Adresses & LinksHave a Lookსლოვაკური და ქართული კერძებიქართული ღვინო
ამერიკა-საქართველოს შორის თანამშრომლობის ქარტია (9.I.2009)
ამერიკა-საქართველოს შორის თანამშრომლობის 6-გვერდიანი დოკუმენტი ამერიკის სახელმწიფო დეპარტამენტის ვებგვერდზე გამოქვეყნდა. დოკუმენტის მთავარი პუნქტების მიხედვით, ორ ქვეყანას შორის თანამშრომლობა ეფუძნება საერთო ღირებულებებსა და ინტერესებს, მათ შორის დემოკრატიის, ეკონომიკური თავისუფლების განვითარებას, უსაფრთხოებას და ტერიტორიული მთლიანობის დაცვას, სამართლის უზენაესობის განმტკიცებას და ადმიანის უფლებების პატივისცემას, ყველა იძულებით გადაადგილებული პირისა და დევნილის უსაფრთხო და ნებაყოფილობითი დაბრუნების უფლების ჩათვლით; ინოვაციებისა და ტექნოლოგიების მიღწევების მხარდაჭერასა და ევრაზიაში ენერგეტიკის უსაფრთხოების გაძლიერებას.
ქარტიის მიხედვით, მხარეები აცხადებენ, რომ მათ საერთო მიზანს წარმოადგენს საქართველოს სრული ინტეგრაცია ევროპულ და ევროატლანტიკურ პოლიტიკურ, ეკონომიკურ, თავდაცვისა და უსაფრთხოების სტრუქტურებში, საქართველოს მიერ აუცილებელი სტანდარტების დაკმაყოფილების საფუძველზე.
თავდაცვისა და შეიარაღებული ძალების უწყებებზე დაყრდნობით, ამერიკის შეერთებული შტატები მხარს დაუჭერს საქართველოს შეიარაღებული ძალების მოდერნიზაციას და თავდაცვისუნარიანობის გაზრდას.
ამერიკის შეერთებული შტატები დაეხმარება საქართველოს ომის შემდგომ რეკონსტრუქციასა და ფინანსურ სტაბილურობაში, ქვეყანაში სიღარიბეში მყოფი პირების რაოდენობის შემცირებაში, ჯანდაცვისა და განათლების სისტემებში ინვესტირებაში ქვეყნის ყოველი მოქალაქის კეთილდღეობისათვის.
ქარტიის პუნქტები ასევე ითვალისწინებს საქართველოსა და აშშ-ს შორის ვაჭრობის გამარტივებას. კერძოდ, ქარტიის საფუძველზე ორ ქვეყანას შორის თავისუფალი ვაჭრობის შესახებ შეთანხმება გაფორმდება.
გამარტივდება ვიზები ამერიკის შეერთებულ შტატებში კულტურის, განათლების, ბიზნესის, სამედიცინო სფეროს კვალიფიციური პირებისთვის. აშშ საქართველოს დაეხმარება თავისუფალი მედიისა და დემოკრატიული ინსტიტუტების მშენებლობაში.